Kevätkuun 14. päivänä huomattava karjalaini horeograffi ta balettimuasteri Viola Malmi ois täyttän 90 vuotta. Merkkipäivällä omissettuo juhlallista lehistönäyttyö vietettih Karjalan tašavallan kanšallisešša musejošša.
Kanšallisešša musejošša piettyh lehistönäyttöh otti ošua Viola Malmin heimolaisie, opaštujie ta yštävie.
– Tänäpiänä on mainivo ta iloni päivä. Kuin vesseläšti mäni joka šyntymäpäivä, konša Viola Malmi oli elošša! Viola Valentinovna lisäsi mahottoman šuuren panokšen Karjalan kulttuurih. Hiän oli oman ruavon innokaš ihailija. Viola Malmi keräsi folklorie 1970-luvulla, vaikka šilloin kehitty internationalismin idejoja, a folklori ei ollun šuosittu. Ka tuli muutokšie ta hänen ruato rupesi kukkimah. Viola Malmi uško omah ruatoh, houkutteli nuorie ihmisie ta pelašti heijän elämie, korošti Kanšallisen musejon johtaja Mihail Gol’denberg.
Lehistönäytöššä esitettih valokuvie Viola Malmin folklorikollektiivien esitykšistä ta Šuomen dramateatterin Kalevala-spektaklista šekä kakši pukuo, kumpasie valmissettih vuotena 1949 Kantele-yhtyvehtä varoin.
Viola Malmin tyttären Anita Dunkersin anšijošta musejon varaštot täyvyttih tunnetun horeografin esinehillä.
– Viola Malmi on šivottu tanšših ta kulttuurih, ka halusima näyttyä tavallista ihmistä ta hänen elämyä. Šentäh on esitetty ihan jokapäiväsie esinehie – Šuomešša tuotettu retkičäijypannu, pölynimuri, ratijo-levyšoittimet. Viola Malmin mieliruatoh kuuluu šauva, kummaista hiän käytti joukkopruasniekoissa, še viittuau karjalaiseh pat’vaškah. Lisäkši on pukuja, valokuvie näyttelmistä, ilmotušlehtien mukah luajittuja puisie taulukkoja. Niitä esinehie musejo šai Viola Malmin tyttäreltä Anita Dunkersilta, kerto lehistönäytön kurattori Sofja Nikitina.
Tilaisutta kaunisti lapšien ta nuorison luovan talon Sozvezdije-tanššiyhtyveh, kumpani esitti Viola Malmin kirjuttaman Kintahankylän 1700-luvun Šinkatanššin. Esitykšen lopušša nuoret artistat karjuttih šuuren horeografin nimi.
– Viola Malmin joka näytelmän lopušša kaikki artistat ta kaččojat ilosešti karjuttih “Viola!”. Še tovisti hänen anšijoita kulttuurie varoin. Niistä tärkeimpänä on še, jotta Viola Valentinovna šai lähekkäh olijie ihmisie mieltymäh meijän kanšalliseh kulttuurih, kumpani on jiänyn monien mieleh ta šyväimeh, šano Sozvezdije-yhtyvehen ohjuaja Nikolai Vahterov.
Teksti: Irina Zaitseva, Oma Mua 23.3.2022
Kuvat: Kanšallisen musejon VK-šivu
