Tašavallan kielikilpailuh otettih ošua karjalan, vepšän ta šuomen kielien opaštujat. Tänä vuotena še piettih online.
Karjalan, vepšän ta šuomen kielien kilpailuh otettih ošua 139 koululaista Karjalan eri piirilöistä šekä Leningradin alovehelta. Kielikilpailu piettih 2. šulakuuta online-muuvvošša. Toimenpivon järještäjänä on Karjalan opaššuškehitykšen instituutti.
– Tänä vuotena ošanottajien miärä šuureni, šentäh kun kielikilpailu pitimä internetissä. Šen lisäkši tänä vuotena ei järješšetty kielikilpailuja koulun tašolla ta opaštajat iče voitih valita, ken ošallistuu tašavallan vaihteheh, šelitti Karjalan opaššuškehitykšen instituutin vararektori Jelena Bogdanova.
Koululaisien piti šuorittua kielitehtävie. 4.–5. opaššušvuosien lapšilla ehotettih kirjuttua šanašto- ta kielioppitehtävie šekä šuorittua harjotuš tekstin ymmärtämiseh.
Yläluokkalaisien niise piti luatie kieliopillisie tehtävie šekä šuorittua kuunteluharjotuš. Šen lisäkši heijän piti kekšie ta kirjuttua pakauttelu Kalevala-eepossan šankarin kera.
– Tänä vuotena kilpailušša ei ollun pakinatehtävyä, šentäh kun online-muuvvošša šitä olis vaikieta järještyä. Šentäh meilä tuli äijän kilpailijie, kumpaset šuatih šaman verran pistehie. Ta šentäh voittopaikoillaki piäsi enemmän lapšie, lisäsi Jelena Gennadjevna.
Koulut, missä opaššetah muamonkielie, valmistauvutah kilpailuh etukäteh. Monen koulun opaštujat piäššäh voittajiksi muutoma vuori peräkkäh.
– Yli kymmentä vuotta meijän koulun lapšet piäššäh kielikilpailun voittajiksi. Nyt Kotkatjärven koulušša on yksi karjalan kielen tunti opaššušohjelman rajoissa ta vielä kakši lisäainehena. Koululaiset, kellä on kiinnoššušta muamonkieleh, voijah šitä opaštuo. Kielikilpailun kynnykšellä myö aina valmistauvumma, opaššumma lisäšanaštuo, kertuamma kielioppie, kerto Kotkatjärven koulun karjalan kielen opaštaja Ol’ga Nikitina.
Kielikilpailun kaikki ošanottajat šuahah ošanottajan tovissukšet, a voittajat šuahah lahjoja ta diplomija.
KARJALAN KIELEN KILPAILUN 2021 VOITTAJAT
4. opaššušvuosi, vienalaiset
1. šija – Sofja Pašukova, Puatenen koulu;
2. šija – Darina Fedotova, Puatenen koulu;
3. šija – Kira Pavlovskaja, Kalevalan koulu.
5. opaššušvuosi, vienalaiset
1. šija – Matvei Katin, Kalevalan koulu ta Polina Unžakova, Šuomelais-ugrilaini koulu.
9. opaššušvuosi, vienalaiset
1. šija – Darja Timonen, Kalevalan koulu;
2. šija – Marija Rigačeva, Šuomelais-ugrilaini koulu;
3. šija – Arina Maršalkova ta Anastasija Križ, Jyškyjärven koulu.
10. opaššušvuosi, vienalaiset
1. šija – Amina Karačova, Kalevalan koulu.
11. opaššušvuosi, vienalaiset
1. šija – Alina Savireva, Jyškyjärven koulu;
2. šija – Aleksandr Teppojev, Puatenen koulu.
4. opaššušvuosi, livviläiset
1. šija – Jekaterina Gagarina, Kotkatjärven koulu;
2. šija – Anastasija Abramova, Šuomelais-ugrilaini koulu ta Jelizaveta Kapel’uš, Aunukšen koulu;
3. šija – Ol’ga Rožkova, Šuomelais-ugrilaini koulu ta Stepan Čaškin, Tuuksin koulu.
5. opaššušvuosi, livviläiset
1. šija – Aleksei Ognev, Šuomelais-ugrilaini koulu ta Viktorija Kuz’mina, Mäkrien koulu;
2. šija – Valerija Stafejeva, Priäžän koulu;
3. šija – Julija Morozova, Priäžän koulu ta Mihail Prokopjev, Aunukšen koulu.
9. opaššušvuosi, livviläiset
1. šija – Veronika Košeleva, Kotkatjärven koulu;
2. šija – Zahar Titov, Petroskoin 2. koulu;
3. šija – Jevgenija Fatejeva, Petroskoin 2. koulu.
10. opaššušvuosi, livviläiset
1. šija – Jegor Kalmikov, Vieljärven koulu;
2. šija – Jekaterina Matsko, Veškelykšen koulu.
11. opaššušvuosi, livviläiset
1. šija – Ivan Kalmikov, Vieljärven koulu;
2. šija – Ksenija Artemjeva, Kotkatjärven koulu;
3. šija – Anastasija Jakovleva, Šuomelais-ugrilaini koulu.
Teksti: Uljana Tikkanen, 14.4.2021 Oma Mua
Foto: Kotkatjärven opaštujat Jekaterina Gagarina (vaš.), Veronika Košeleva ta Ksenija Artemjeva piäštih kielikilpailun voittajiksi. Kuvašša koululaiset ollah karjalan kielen opaštajah Ol’ga Nikitinan kera. Kotkajärven koulun arhiivašta.