Kyly on häijen tärkie oša ta rituali. | Antilahan itulla oli šuuri merkityš. Kuvat: Dmitrii Ivanov, Oma Mua.
Kalevala-runoelman päivänä ta Hete-folklori ryhmän 40-vuosipäivänä Koštamukšen musiikkikoulun lavalla oli esitetty Antilahan kyly -spektakli.
Näytelmä on peruššettu karjalaisien tosiperintehih ta on valmissettu kotimuah rakkahuolla. Spektaklin käsikirjutukšen valmisti Ol’ga Maksimova, a ryhmän johtajana on Artur Jefremov.
Perintehellisešti häitä piettih talvella tahi kešällä, ka rikeneh šykyšylläki. Täkši ajakši oltih täyvet puurnut šyömistä: šato oli korjattu ta kaikenmoista kalua šuatu yllin kyllin. Hyvä aika pityä hiät. Tai nuoret ei mänetetty šitä aikua tyhjäh. Neiččyöt ta prihat kisattih illačuissa ta pes’s’outoissa, laulettih, tanššittih ta ečittih ičelläh pari.
Kyläpruasniekoissa, kumpasie piettih joka kyläššä, nuoret valittih ičellä mielitietyn, a šiitä tietyšti käytih kos’s’omah. Huomuan, jotta karjalaisešša kulttuurissa neiččyöllä oli oikeuš valita šulhasen.
Antilahan kyly -näytelmä kertou šiitä hiäošašta, konša šulhani oli jo valittu ta antilaš kos’s’ottu. Hiäpäivä oli miärätty, ka ilman kylyö šiih ei šuanun lähtie. Antilahan kyly on tärkie rituali, konša neičyt eruou vanhempien talošta ta šuau antilahan statussin. Potruškat juoštih ritualih, a heimolaiset vuotettih antilašta koissa.
Jotta poislähtö mänis oikein, piti ruatua kaikki perintehen mukah. Tuatto työnti kakrapokot šuamah erityistä vereštä vaštua antilahan kylyö varoin. Okšat vaštua varoin piti kiskuo käsin, eikä leikata veičellä. Šiitä antilahalla lämmitettih kyly. Veteh lisättih taikaesinehie, jotta še šais erikoisvoimua.
Kylyššä neičyt ta kakrapokot itettih. Antilahan itulla oli šuuri merkityš. Še merkičči poismänömistä tuaton talošta, eruomista omašta pereheštä ta entiseštä elämäštä. Kyynälet näytettih šekä tuškua, jotta muinoisaikojen kunnivuo, niillä oli magista voimua.
Kaikkien näijen toimien aikana laulettih ikävie ta toičči ilosie lauluja ta tanššittih. Niitä lauluja ta tanššija esitettih Hete-ryhmän artistat.
Folkoriryhmän ošallistujat kiitetäh kaččojie lämpimäštä vaštahotošta ta kiinnoššukšešta karjalaiseh kulttuurih.
Aleksandra Lesonen, Oma Mua 12.3.2025
