Piäkuva: Kanteletar-festivalin rajoissa vietettih kyykkä-pelin kilpailut. Kuva: Irina Kuznetsova
Kanteletar-festivalin toisena päivänä, 8. tuiskukuuta, Koštamukšen kyykkä-kentällä vietettih kanšallisen kyykkä-pelin šuuret kilpailut. Še oikein muissuttau gorodki-pelie. Peluajien piätarkotukšena on lyyvvä kentäštä pois šuurimman miärän kyykkie.
Kilpailomah tuli joukkoja Karjalan eri ošista: Kontupohjašta, Segežašta, Sortavalašta ta Kalevalašta. Kaikkieh oli kymmenen joukkuo.
– Kyykkä vain enši kačahukšelta on helppo peli. Ka šiinä on äijän yksityiskohtie: pitäy olla tarkka huomijo, jotta lyönti olis tarkka, ta heittyä pualikka šamoin pitäy oikein. Tämä vanha peli kehittäy voimua, tarkkutta, kykyö ruatua joukošša. A vielä parentau mieltä ta tervehyttä, šentäh kun myö peluamma verekšellä ilmalla, šelitti Pelionni-joukon ošallistuja Nina Aleksejeva.
Ennein kilpailuo joukot yštävällisešti tervehittih toini toista. Šiitä peluajat lähettih omilla pelipaikoilla ta ruvettih kilpailomah. Kaikešta vaikein oli lyyvvä viimeset kyykät. Eryähät šanottih niitä hernehyiksi ta neuvottih joukkokaveriloilla lyyvvä pyöryškällä, jotta “kerätä niitä”.
Kilpailun tulokšena oli Kalevalan Otava-joukon voitto, toisella paikalla piäsi “NORD” Kontupohjašta ta pronssin šai Kičut-ryhmä Kalevalašta.
Tuiskukuun 9. päivänä peluajat kilpailtih henkilökohtasešti. Miehien kešen voitti Dmitrii Paškov Kontupohjašta. Naisien kešen tarkimpana oli peluaja Tatjana Pl’uhina Sortavalašta.
Teksti: Irina Kuznetsova, Oma Mua 19.2.2025
