Uušie art-objektija ašetettih Petroskoin eri paikoissa Karjalan tašavallan 100-vuotisjuhlakši. Kaikkieštah muistomerkkijä on kahekšan. Metallista, puušta ta kiveštä luajittuja veššokšie jo šuau nähä Petroskoin keškuštašša.
Art-objektija ašetettih Severin- ta ETD-yritykšet. Taitokohtien luatijina ollah kuvanveštäjät Aleksandr Kim, Vladimir Zorin ta Aleksandr Saveljev. Šuurimman ošan veššokšista luati taiteilija Vladimir Zorin.
Petroskoin Onegajärven rantakavulla ašetettih enšimmäini art-objekti – Karjalalla on 100 vuotta -veššoš. Šillä on kahekšankulmani tähti, kumpaista šanotah karjalaisekši tähekši. Tähti on karjalaisen perintehellisen merkkaukšen kuvana šekä on valon ta kunnivon merkkinä.
Veššokšien luatijat šelitetäh, jotta kaikki art-objektit liitytäh Karjalan perintehih. Esimerkiksi, šamoin rantakavulla Sverdlovin kavun rappusien vaš tapiätä on Mujeh-veššoš. Tämä on vaihtamatoin kala karjalaisien ruuvvašša.
“Toivehen puun” lähellä ašetettih Karjalaini meččä -nimini veššoš. Kaupunkilaisilla heti ei tullun šelvä, mitä nämä kirjaimet ta numerot merkitäh. Veššokšen luatija Vladimir Zorin šelitti, jotta kaikki numerot ta kirjaimet on Karjalašša kašvajien puijen lajien numerot. Šamoin art-objektissa šuau nähä näijen puijen palasie.
Petroskoin keškikavulla – Leninin prospektilla nyt on Kontie-veššoš. Šeki ilmešty šielä ei šattumalta. Mečän isäntä on tärkie henkilö karjalaisien uškonnošša, šamoin še eläin on esitetty tašavallan vuakunašša.
Karjalan Kuklateatterin lähellä on karjalan kielen kirjaimikon Ä-kirjaimen veššoš “Panka pistehet A:n piällä”. Šen piällä on veššetty kirjaimikon toisieki kirjaimie. Taitokohta muissuttau, jotta karjalan kieli on Karjalan kantakanšan muamonkieli ta jotta karjalaisilla on kirjakieli.
Gagarinin aukivolla on ašetettu karjalaisien perintehellisellä piirualla omissettu Aleksandr Saveljevin luatima Kalittaveššoš. Kaupunkin vierahat voijah maisella kalittoja Petroskoin monešša kahvilašša šekä nähä šitä art-objektina. Šamoin Aleksandr Saveljev on Onegajärven rantakavulla olijan Paikka valokuvan ottamista varoin -taitokohan kekšijä ta luatija.
Aleksandr Kim on Karel’skie fi ški -nimisen taitokohan luatija. Še šijoutuu rantakavulla Onegan linna -hotellin lähellä.
Paikkojen valinta art-objektija varoin niise oli tärkienä tehtävänä. Piti valita šemmoset paikat, jotta niitä nähtäis Petroskoin vierahat ta jotta ne oltais lähellä olijien rakennukšien kera šamašša tyylissä ta korissettais Karjalan piäkaupunkie.
Teksti: Uljana Tikkanen, Oma Mua 1.7.2020
Kuva: Ol’ga Smotrova
