Šulakuun 23. päivänä Käsityöammattien talošša vallasi n’ulačču, ka iloni ilmapiiri. Vet šinä päivänä oli vietettävä uuvven Uikujärven työpaja-näyttelyn avajaiset.
Segežan piirin käsityömuasterien luajokšien Uikujärven työpaja -näyttely jatkau Karjalan tašavallan 100-vuotisjuhlalla omissettuo šarjua. Šarjan rajoissa kävijillä esitetäh Karjalan piirin muasterien töitä.
Näyttelyn avajaisih otettih ošua Segežan piirin piämieš Valentin Dorofejev, piirin hallinnon johtaja Marina Guseva ta Karjalan tašavallan kulttuurin varaministeri Varvara Lebedeva.
– On iloista, jotta näyttely on avattu. Ka šiinä on esitetty vain pieni oša, vet Segežan piiri on tosi rikaš nerokkahilla ihmisillä. Erähät niistä ollah vuatimattomie, min takie ei haluttu näyttyä omie töitä julkisešti. Toivon, jotta enši kertua šuamma esittyä enemmän muasterija, korošti Marina Leonidovna.
Näyttelyššä on esillä Segežan ta Vojačču-pos’olkan tunnettujen käsityömuasterien yli 50 luajošta. Muasterien luvušša on Aleksei Darjev, Mihail Fet’ulin, Jelizaveta Maksimova, Nadežda Logačeva, Natalja Jegorova, Anna Kozlova, Viktorija Čauzova, Sergei Kondratjev ta muut.
– Myö halusima näyttyä, millä Segežan piiri on rikaš käsityöammattien ta käyttötaijon näkökulmašta. Pandemijan takie emmä voinun avata näyttelyö viime vuotena. Ka kakši kuukautta takaperin muasterit piätettih, jotta šulakuušša tulou näyttely. Erähie luajokšie valmissettih juuri täkši tapahtumakši, kertou Käsityöammatien talon ruataja Viktorija Dragun.
Jelizaveta Maksimova ta Aleksei Darjev ollah Karjalan anšijoitunuot kulttuurialan ruatajat.
– Aleksei Viktorovič on Karjalan kanšanmuasteri. Hiän valmistau eri kotiesinehie ta huonehkaluja pahkašta. Jelizaveta Maksimova luatiu karjalaisie pukuja paperista. Niistä on tullun Segežan ta Karjalan simvoli. Niitä voit ušein nähä festivaliloissa, kilpailuissa ta muissa tilaisukšissa, jatkau Viktorija.
Šuurin oša töistä kuuluu nykyaikaseh käyttötaitoh, ka erähät esinehet on luajittu perintehelliseššä tekniikašša. Esimerkiksi, kuvotut prošvat ta lasihelmistä valmissetut gerdan-kaklakorissukšet.
– Gerdan oli puvun elementtinä etupiäššä Venäjän šuviošissa, esimerkiksi, Voronežin alovehella, šelittäy Käsityöammattien talon ruataja.
Esillä olijien tevokšien joukošša on tuohiveššokšie, ompeluo, pahkaluajokšie, prošvoja, korissukšie, puun veššäntyä, luatijan kukloja, juuttifiligranin tekniikašša luajituja töitä. Joka luajoš kuvaštau luatijan omua košetušta alovehen istorijalliseh perintöh ta nykyaikaisuoh.
Kävijillä on mahollisuš tuttavuštuo Segežan piirin muasterien töih oraškuun 22. päiväh šuaten.
Teksti ta foto: Irina Zaitseva, Oma Mua 5.5.2021
