Sanaston luajindu on tärgei vuitti karjalan kielen elvytändiä da kehitändiä. Muailman muuttujes da kielen kehittyjes kaikile kielile, eloivoimazilegi, pidäy uuttu sanua, ga varavonalazen kielen kohtal sanastoruado on alalleh keräl, joga kohtas da joga päiviä.
Sen-tämän sanan voit kebjieh mugavuttua libo ottua laihinakse paistes, ga konzu kieleh pidäs läs joga paginas luadie midätahto uuttu, se voibi jo vaikuttua uuzien pagizijoin mahtoloih ruveta käyttämäh sidä. Enne kaikkie tämä probliemu koskou eloksenaloi, kudualoil perindöllizesti ei ole paistu karjalakse.
Päivännouzu-Suomen yliopiston blogas on jullattu jogahizen pagizijan avukse da luadijoin omakse tuvekse azuttuloi sanastoloi jo vuvves 2021 algajen. Täs lyhyččäzes tekstas ozutellah erähii niilöis.
Opaštujan eloš -šanašto
Elena Ravan yhtes toizien kielispecialistoin da -aktivistoinke luajittu opastujan elostu koskii sanasto on jullattu yhtelaigua kaikil kolmel karjalan piämurdehel. Sih on kerätty enimite yliopisto-opastujan jogapäiväzeh elokseh da eriluaduzih pidoloih liittyjiä sanastuo, ga se tariččou mieldykiinnittäjiä duumaittavua toizilegi.
Sanasto ozuttau hyvin sanastoruavon kreatiivižuttu. Sanaluvettelos voit löydiä ezimerkikse kanzoinvälisty laihinsanua: ezmäzen vuvven opastujua merkiččii suomen sana fuksi on kiännetty muodoloih repo, rebo da reboi, sendäh gu suomen sana tulou germuanien kielen reboidu tarkoittajas Fuchs-sanas. Ezmäzen vuvven opastujile tarkoitetut pivot, suomekse fuksiaiset, ollah karjalakse repočut libo rebočut. Eričysmainičendu pidäy vie opastujien sitsit-pajopruazniekan kiännöksele: karjalakse voit kävvä stolaččuloih. Stolaččuniekan tuvekse on luajittu hyväččäine stolaija-verbigi: minä stolaičen, häi stolaiččou, hyö stolaijah. Stola-kandu liittyy tiettäväine sih, gu piduo pietäh stolah iäres istujen da pajattajen.
Linku sanastoh:
Lykkyy jogahizele sanasto- da kieliruadoh! Mustakkua, gu karjalan murdehet tävvendetäh da avvutetah toine tostu da gu karjalakse voibi paista jogahizes dielos, ni yksi dielo ei jiä sanomattah. Kehitämmo kieldy yhtes – da paistes se kehittyy buitegu ihan huomuamattah.
Teksti: Niko Tynnyrinen
Kuva: Pixabay
Luve ližiä:
Karjalankieline sanasto joga tilandeheh, oza 1: Kazvossyöjän sanasto
