Sanaston luajindu on tärgei vuitti karjalan kielen elvytändiä da kehitändiä. Muailman muuttujes da kielen kehittyjes kaikile kielile, eloivoimazilegi, pidäy uuttu sanua, ga varavonalazen kielen kohtal sanastoruado on alalleh keräl, joga kohtas da joga päiviä.
Sen-tämän sanan voit kebjieh mugavuttua libo ottua laihinakse paistes, ga konzu kieleh pidäs läs joga paginas luadie midätahto uuttu, se voibi jo vaikuttua uuzien pagizijoin mahtoloih ruveta käyttämäh sidä. Enne kaikkie tämä probliemu koskou eloksenaloi, kudualoil perindöllizesti ei ole paistu karjalakse.
Päivännouzu-Suomen yliopiston blogas on jullattu jogahizen pagizijan avukse da luadijoin omakse tuvekse azuttuloi sanastoloi jo vuvves 2021 algajen. Täs lyhyččäzes tekstas ozutellah erähii niilöis.
Lapsenkielen sanasto
Olga Karlovan vienankarjalakse luajittu lapsenkielen sanasto ozuttelou lapsenkielen da lapsienke paistun kielen sanastuo vienankarjalakse, ezimerkivirkehien da vuoropaginoinke. Sanasto mieldykiinnittäjäl taval tävvendäy karjalan sanastoresursoi, sendäh gu sanakniigoih tavan mugah nostettu sanasto on kirjukieline da virralline. Kieleh opastujan voit olla jygei opastuo paginkielizembäh stiil’ah, ni pagizemattah jogapäivähizes höpötändäs iččeh lapsenke. Ollet konzutahto duumainnuh, kuibo sanuo karjalakse kakattaa (čičittyä) libo murjottaa (murčottua), tämä sanasto on sinule avukse!
Sanastos lövvät sanoin ližäkse erähät kaikis ylehizembät käskyt da nevvot: tule tänne poikkoseh, elä mäne ajotiellä, issu paikalla…
Linku sanastoh:
Lykkyy jogahizele sanasto- da kieliruadoh! Mustakkua, gu karjalan murdehet tävvendetäh da avvutetah toine tostu da gu karjalakse voibi paista jogahizes dielos, ni yksi dielo ei jiä sanomattah. Kehitämmo kieldy yhtes – da paistes se kehittyy buitegu ihan huomuamattah.
Tekstu: Niko Tynnyrinen
Piäkuva: Aline Dassel/Pixabay
Luve ližiä:
Karjalankieline sanasto joga tilandeheh, oza 1: Kazvossyöjän sanasto
Karjalankieline sanasto joga tilandeheh, oza 2: Opaštujan eloš -sanasto
Karjalankieline sanasto joga tilandeheh, oza 3: Detektiivusanasto da kirjalližussanasto
