Vuvven 2024 verotiijot jullattih kolmanpiän
Suomen kovatulohizin ristikanzu kolmattu vuottu peräkkäi on Wolt-syömiskurjieruyhtivön Mikko ”Miki” Kuusi piäl 80 (kaheksankymmenen) miljonan euron tuloloil.
Meččytevoližuskonsernu Metsä Group sanoi kolmanpiän, gu se vähendäy Suomes 520 (viizisadua kaksikymmen) alallistu ruadotehtäviä muutosnevvotteluloin täh.
Kuolenduozattomuksis dorogoil puaksuh on ajettu ylivauhtii.
Lapsiperehien köyhys liženöy da enimite yksinhuoldajanperehien probliemat syvetäh.
Yksi tämän vuvven kuvves kaunehkirjalližuon Finlandia-palkindon ehoitettulois on Riko Saatsin Yönistujat. Romuanu sanelou karjalankielizes vähembistös 1950 (tuhat yheksäsadua viizikymmen) -luvun Suomes, kuduas evakkopereh jouduu peittämäh omassah kielen, vieron da kul’tuuran.
Minna Kettuzen Jaetun maan lapset -romuanas on luajittu livvinkarjalaine kiännös Juatun muan lapset. Niko Tynnyrizen da Natalia Giloevan kiännetyn romuanan on piästänyh ilmah Salmi-Fondu da sen julguandupruazniekku pietäh 20. (kahteskymmenes) kylmykuudu Lapinlahtel.
Kuundele liziä Yle Areenas: https://areena.yle.fi/1-75999563
