Sanaston luajindu on tärgei vuitti karjalan kielen elvytändiä da kehitändiä. Muailman muuttujes da kielen kehittyjes kaikile kielile, eloivoimazilegi, pidäy uuttu sanua, ga varavonalazen kielen kohtal sanastoruado on alalleh keräl, joga kohtas da joga päiviä.
Sen-tämän sanan voit kebjieh mugavuttua libo ottua laihinakse paistes, ga konzu kieleh pidäs läs joga paginas luadie midätahto uuttu, se voibi jo vaikuttua uuzien pagizijoin mahtoloih ruveta käyttämäh sidä. Enne kaikkie tämä probliemu koskou eloksenaloi, kudualoil perindöllizesti ei ole paistu karjalakse.
Päivännouzu-Suomen yliopiston blogas on jullattu jogahizen pagizijan avukse da luadijoin omakse tuvekse azuttuloi sanastoloi jo vuvves 2021 algajen. Täs kirjutussarjas ozutellah erähii niilöis.
Kazvossyöjän sanasto
Niko Tynnyrizen luajitus kazvossyöjän sanastos livvinkarjalakse kerrotah nygyaigazis kazvossyömizis karjalakse. Karjalan oma kazvossanasto on ylen bohattu ezimerkikse pravoslaunoin pyhän aijan syömizien vuoh, ga on sanastos loukkuogi. Jo nenga kymmenen vuvven aijan veguanizet syömizet ollah oldu movvas, da uuzii produktoi da kazvosprotejiinoi luajitah ravieh. Ližäkse äijis kazvossyömizis käytetäh ruohkuainehii, kudualoi perindöllizesti ei ole tundiettu Karjalan alovehel.
Sanaston lugiettuu tiijät, gu sipsikaljavegaani on karjalakse čipsupiivoveguanu da kauravispi kazvivuahtisliuhku!
Linku sanastoh:
Lykkyy jogahizele sanasto- da kieliruadoh! Mustakkua, gu karjalan murdehet tävvendetäh da avvutetah toine tostu da gu karjalakse voibi paista jogahizes dielos, ni yksi dielo ei jiä sanomattah. Kehitämmo kieldy yhtes – da paistes se kehittyy buitegu ihan huomuamattah.
Teksti: Niko Tynnyrinen
Kuva: Pixabay
