Karjalan kielen nedäli korgenou tänäpäi karjalan kielen pruazniekkupäiväl
Tänäpäi nellänpiän pruaznuijah karjalan kielen päiviä. Suomen Kirjalližuon Seuran huonuksis Helsingis pietäh Suomes paistavan livvinkarjalan kehittäjän, opastajan da filosoufien dohtoran Raija Pyölin pruazniekkuseminuaru. Karjalan Sivistysseuran organizuitun seminuaran programmas on ezitelmii karjalan kielen elvytändäs da kehitändäs. Ližäkse seminuaras jullatah Raija Pyölin livvinkarjalakse kiännetty, metropoliittu Panteleimonan kirjutettu dekku Kenbo olet, Jussi Randu.
Tänä vuon jo kuvvettu kerdua piettävän karjalan kielen nedälin tiemannu on karjalan suulline käyttö.
Euroupan komissii sanoi kolmanpiän, gu Suomi pannah alijiämymenettelyh libo muga sanotule EU:n tarkailuluokale.
Ruavottomien miäry nouzou iellehgi. Ruavottomua oli ligakuul 276 000 (kaksisadua seiččiekymmen kuuzi tuhattu) libo 48 000 (nelliäkymmendy kaheksua tuhattu) enämbi, migu mulloi.
Tehnolougiitevoližuon aloile pidäy kai 140 000 (sada nellikymmen tuhattu) uuttu ruadajua tulien kymmenen vuvven aigua, muga arvivoijah kyzelys alan yritykset.
Lapsiensuojelendu nygöi on hyvinvoindualovehien vastuol, ga palvelu vie ei rua täyzin zakonanmugahizesti.
Tulli on konfiskuinnuh tänä vuon jo rekordumiärän narkoutiekkuainehtu.
Influensukauzi on zavedinnuhes Suomes tavanmugastu aijemba. Tervehyön da hyvinvoindan laitoksen mugah dogadittuloin tapahtuksien miäry on kazvamas.
Kuundele ližiä Yle Areenas: https://areena.yle.fi/1-75999567
